Aurrerantzean tren gutxiago egongo da Gipuzkoako Aldirietan, eta polikiago joango dira

Renfek ordutegia aldatuko du Gipuzkoako Aldiriko trenen zerbitzuetan gaurtik aurrera, trenbide sarearen azpiegituran obrak egiteko.

Ohar baten bidez jakinarazi duenez, astelehen honetan beste ordutegi bat sartuko da indarrean Irun-Brinkola linean, Adif Gipuzkoan abiadura handia ezartzeko egiten ari den obren ondorioz.

"Ordutegi berriak ordutegi-eskaintza murriztea dakar, bide bakarra ezarriko baita Hernani eta Donostia artean, eta bidaia-denborak handituko baitira Andoain-Irun tartean", azaldu du, eta ordutegi-aldaketa guztiak webgunean kontsulta daitezkeela gaineratu du.

Gainera, eskariari aurre egiteko, Brinkola eta Irun arteko zenbait trenek konposizio bikoitza izango dute. Aldirietako trenen bidaiariek Distantzia Ertaineko trenak ere erabili ahal izango dituzte.