Gamesako lan-erregulazioak 273 langileri eragingo die

Yolanda Barcina Nafarroako presidenteak iragarri duenez, Gamesako lan-erregulazio txostenak 273 langileri eragingo die Nafarroan.

Izquierda-Ezkerra taldeak Parlamentuan agerraldia eskatu zuen auzi honen inguruan hitz egiteko eta bertan azaldu du presidenteak Gamesarekin "etengabe kontaktuan" daudela konpainiak aurkeztutako lan-erregulazioaren ostean, "enplegu galerak gutxitzeko asmoz".

Ildo honetan, hasieran 800 kaleratze inguruz hitz egin zela gaineratu du, baina orain 273 direla, "nahiz eta kaleratze bat bera egotea ere albiste txarra den".

Barcinak kaleratzeak ekiditeko lanean jarraituko duela esan du.

Enpresa batzordeak "inplikazioa" eskatu dio Barcinari

Gamesako enpresa batzordeak "inplikazioa" eskatu dio Nafarroako presidenteari, Parlamentuko agerraldiarekin bat eginda, Ganberaren kanpoaldean protesta egiteko bildu direnean. "Bere esku dagoen guztia egiteko" esan diote eta lan-erregulazio txostenak "langileengan izango duen eragin latza gutxitzeko" akordioetara iristeko eskatu diote.

Bestalde, batzordea "haserre" azaldu da presidentearen agerraldiaren amaieran, komunikabideen bitartez jakin dutelako kaleratzeen kopurua.