Gizon bat hil da Berrizen autoak zutabe baten aurka talka eginda

36 urteko gizonezko bat, Zaldibarreko auzokidea, hil da Berrizen (Bizkaia) ibilgailua errepidetik atera eta zutabe baten kontra talka egin ostean, Ertzaintzak jakinarazi duenez.

Istripua larunbat honetan jazo da, 15:15ak aldera, N-634 errepidean.

Gizonezkoak zauri handiak jaso ditu, ondorioz, bertan hil da. Gorpua ibilgailuaren barnean geratu da harrapatuta; hori dela eta, suhiltzaileak izan dira lanean hilotza bertatik ateratzeko. Ondoren, gorpua Bilboko Auzitegiko Patologia Zerbitzura eraman dute, autopsia egin diezaioten.

18:00ak arte, gutxi gorabehera, garabi bat izan da bertan ibilgailua eramateko. Ondorioz, errepidearen errei bat itxita egon da.

Ertzaintzak ikerketa abiatu du istripuaren nondik norakoak argitzeko, Segurtasun Sailak jakitera eman duenez.