Gidabaimenik gabe eta drogatuta gidatzea egotzita atxilotu dute

Ertzaintzak 49 urteko frantziar gizon bat atxilotu du Zarautzen (Gipuzkoa), drogen eraginpean eta gidatzeko baimena kenduta zuela gidatzen ari zela, Eusko Jaurlaritzako Segurtasun Sailak jakinarazi duenez.

Atzo, arratsaldeko zazpietan, AP-8 autobidearen erabiltzaile batek SOS Deiakera deitu zuen, frantziar plakak zituen ibilgailu bat modu bitxian zihoala abisatzeko. Izan ere, errei batetik bestera mugitzen zen, inguruko bidaiariak arriskuan jarrita

Zirkulazio patruila batek ibilgailu susmagarria aurkitu zuen, Bilborako noranzkoan. Hala, Zarauzko ordainlekuan geldiarazi, eta alkoholemia eta drogen kontrola egin zioten.

Alkoholaren proban negatibo eman zuen, baina drogen kontrolean positiboa.

Gainera, ibilgailua gidatzen zuen frantziar hiritarraren datuak baieztatu ostean, Ertzaintzak Hendaian duen Polizia eta Aduana Koordinazio Zentroak jakinarazi zuen Frantzian gidabaimena kenduta zuela, eta, horregatik, atxilotu zuten.