Nanoteknologiari buruzko Europako topaketarik garrantzitsuena, BECen

Barakaldoko BECek Imaginenano 2013 ekitaldia hartuko du apirilaren 24an eta 25ean, hau da, nanoteknologiari eta nanozientziari buruz Europan egiten den topaketa handiena eta garrantzitsuena.

Topaketa horretan, hainbat erakustaldi eta lan-bilerak antolatuko dituzte, garatzaileak eta erabiltzaileak batu, eta arlo honetan lankidetza sustatzeko helburuz.

Hori horrela, teknologia zentroek, unibertsitateek, laborategiek eta ikertzaile pribatuek euren lanak aurkezteko espazioa izango dute BECen, balizko erosleak edo kolaboratzaileak topatzeko.

Hain zuzen ere, nanozientziak hainbat arlotan izan dezakeen erabilera izango dute azergai, hala nola medikuntzan, bioteknologian, sendagaietan, energian, materialetan, kimikan, robotikan, elektronikan eta ingurumenean.

Ekimena sustatzen duten erakundeen artean NanoBasque, Innobasque, Grenobleko (Frantzia) Merkataritza eta Industria Ganbera eta Espainiako Ikerketa Zientifikoen Zentro Gorena daude.