Osteoporosiaren kontrako hainbat botika merkaturatzea debekatu dute

Botika eta Osasun Arloko Produktuen Espainiako Agentziak (Aemps) osteoporosiaren tratamenduan erabiltzen diren hainbat medikamentu merkatutik kentzeko agindu du, hain zuzen ere, sudurretik hartzen diren kaltzitonina duten horiek. Ikerlariek hainbat saiakuntza klinikotan ondorioztatu dutenez, minbizia izateko arriskua handitu egiten da kaltzitonina duten botikak luzaroan hartzen dituzten gaixoengan. Ondorioz, sudurretik hartzen diren kaltzitonina duten medikamentuak ez agintzeko eta ez banatzeko eskatu die Aemps agentziak osasun arloko langileei.

Sudurretik hartzen diren kaltzitonina duten medikamentuen merkaturatzea bertan behera utzi du Aemps agentziak, eta orain injekzio bidez hartzen diren medikamentuak aztertzen ari da.

Ikerlariek diotenez, medikamentu horiek epe laburreko tratamenduetan erabili behar dira soilik, hainbat saiakuntza klinikotan frogatu ahal izan denez minbizia izateko arriskua handitu egiten da horiek luzaroan hartzen dituzten gaixoengan.

Osteoporosiaren tratamenduan beste hainbat botika daudela kontuan hartuta, aipaturiko horiek ez hartzea gomendatzen du Aemps agentziak.

Debekuak botika hauei eragiten die, eta guztiak ere sudurretik hartzekoak dira: kaltzitonina almirall 200, kaltzitonina hubber 200 (dosi bakarreko tratamenduetarako), kaltzitonina hubber 200  (dosi anitzekoa), osteobion 200, calsynar 200, miacalcic 200, oseototal 200 eta ospor 200.