Liskar baten ondorioz Bilbon gizon bat hiltzeagatik errudun jo dute

Herri epaimahai batek errudun jo du Aljeriako gizonezko bat, 2012an Bilboko taberna baten kanpoaldean piztutako errieta baten ondorioz 45 urteko Marokoko herritar bat hiltzeagatik. Epaimahaiak errudun jo du 40 urteko akusatua.

Epaiaren arabera, eztabaida baten ondoren, inputatuak arma zuria soinean hartu zuen, Bilboko taberna batean biktimarekin elkartu aurretik. Epaimahaiak frogatutzat jo du, bertan zeuden bi lekukoen testigantza oinarri hartuta, Marokoko herritarrak arazoa ''kanpoan konpontzera'' deitu zuela aljeriarra.

Behin kanpoan, marokoarrak arma zuria zuela ikusita, labana atera zuen aljeriarrak, eta bularrean sartu zion. Erasoak eragindako odol-jario bortitzaren ondorioz berehala hil zen biktima.

Epaia irakurri ondoren, Ministerio Fiskalak eta akusazioak 12 eta 15 urteko kartzela zigor eskaerari eutsi diote.

Defentsak, berriz, hilketa eragiteko asmoa frogatuta geratu ez dela erantzun du, eta eskaera horren kontra agertu da.

Datozen egunotan kaleratu beharko du azken erabakia epaileak.