11 urteko kartzelaldia, Bilbon gizon bat hiltzea egotzita

Hamaika urteko kartzela zigorra ezarri dio Bizkaiko Probintzia Auzitegiko lehenengo aretoak gizon bati, 2012ko apirilaren 1ean Bizkaiko hiriburuko Iturribide kalean gizon bat hiltzeagatik.

Kartzelaldiaz gain, ezingo da biktimaren seme-alabengandik eta ilobarengandik 500 metro baino gutxiagotara gerturatu, ezta hamar urtean horiekin harremanetan jarri ere. Halaber, 320.000 euro ordaindu beharko ditu kalte-ordain gisa.

Epaian irakur daitekeenez, erasotzaileak eta biktimak eztabaida izan zuten 2012ko apirilaren 1ean, eta, ondoren, borroka hasi zuten.

Antza denez, goizean eztabaida izan zuten, eta, 20:00ak inguruan, Bilboko Iturribide kaleko taberna batean, elkarrekin topo egin zuten berriro. Tabernatik atera eta, arma zuriak eskuan zituztela, borrokan hasi ziren.

Horretan ari zirela, biktimak zauria egin zion eskuan erasotzaileari, eta hark hil egin zuen, labankadaz.

Bere buruaren defentsan hil zuela adierazi zuen akusatuak, baina epaileak ez zuen haren esana kontuan hartu.