Lankidea hiltzeagatik atxilotutako adingabea zentro batera bidali dute

Jose Javier Garcia Gutierrez lankidea hiltzea leporatuta adingabe bat atxilotu zuen Ertzaintzak atzo, Gasteizen. Arratsaldean Zumarragako (Gipuzkoa) adin txikikoen zaintza-zentroan sartu dute.

Ikerketako iturriek jakitera eman dutenez, Gasteizko Adin Txikikoen Epaitegiak zentrora bidaltzea erabaki du eguerdian.

Adingabe bat atxilotu zuen atzo (osteguna) Ertzaintzak Gasteizen, 52 urteko Jose Javier Garcia Gutierrez hiltzea leporatuta. Biktima indarkeria zantzuekin hilik aurkitu zuten maiatzaren 22an, Gasteizko garaje batean.

Arabako Fiskaltzak jakitera eman duenez, ikerketan zehar lortutako zantzuei eta froga biologikoei esker egin dute atxiloketa. Adingabea datozen orduetan eramango dute Adingabeen Gasteizko Epaitegira.

Biktimaren lankidea

Atxilotua biktimaren lankidea zen eta elkarrekin joaten ziren egunero lanera kotxe berean. EiTBk jakin duenez, hilketaren egunean, egunero bezala, garajean geldituta zeuden ustezko hiltzailea eta biktima.

Krimenak Lakua-Arriaga auzoa hunkitu zuen. Gizonaren hiltzailea identifikatu eta atxilotzeko ikerketa sakona abian jarri zuen Ertzaintzak. Biktimaren semeak berak topatu zuen gorpua Gasteizko garaje batean.

52 urteko Jose Javier Garcia Gutierrez soldatzailea ezkonduta zegoen eta bi seme-alaba zituen.

Lanera heltzen ez zela ikusita, biktimaren lankideek etxera deitu zuten eta semeak gorpua aurkitu zuen garajean.

Garajea, Batzar Nagusietako kalean, Lakua-Arriaga auzoan dago. Semea aitaren autoa bertan zegoen egiaztatzera joan zen, baina gorpua komunean topatu zuen.