Sei pertsona atxilotuta, enpresa bati 110.000 euroko maula egiteagatik

Ertzaintzako agenteek Ortuellan sei gizonezko atxilotu dituzte ostiral honetan, enpresariak izango balira bezala Internetetik arropa erostea eta bankuko txeke faltsuekin edota dirurik ez zutenekin ordaintzea, ondoren azoka txikietan saltzeko, leporatzen zaie.

Segurtasun Sailak jakitera eman duenez, Ertzaintzak 110.000 euroko maula egitea leporatu die Murtziako zuntz-enpresa bati, kaudimen handiko enpresaritzat jarriz euren buruak eta Internetetik hainbat zuntz produktu erosiz.

Uztailaren 18an, gizonezko bat Ertzaintzara joan zen, Murtziako enpresa batek 15.000 euro ordaintze eskatzen ziola jakinaraztera, berak egin ez zuen erosketa bategatik: hondartzarako 3.100 toalla.

Agenteek erosketa bere izenean eta beste enpresari batenean egin zela frogatu zuten. Dirudienez, posta elektroniko baten bidez egin zen, eta eskaera maiatzaren 21ean entregatu zen.

Garraiolariak merkantzia emakumezko bati eman zion, Erandioko eremu batean, haren hitzetan, salgaia utzi behar zuen lokala itxita zegoelako, obrak zirela eta.

Baina agenteek lokal hori existitzen ez zela frogatu zuten, eta identitate-ordezpenerako datuak Interneten lortu zituztela.