Eraikin bat jendez hustu dute Galdakaon, sute baten ondorioz

Galdakaoko pabilioi batek su hartu du goizaldean, eta goiko bizilagunak etxetik atera behar izan dituzte.

Suhiltzaileek 03:45erako sua itzaltzea lortu dute eta ez da inor zauritu. Hala ere, kalte materialak izan dira.

02:20an piztu da sua eta sutea zerk eragin duen ikertzen ari dira orain, Eusko Jaurlaritzako Segurtasun Sailak jakinarazi duenez.

Suaren eraginez, N-634 errepidea itxi behar izan dute Donostiarako noranzkoan.