Gizartea -
Gertakaria
Bi atxilotu Santutxun, gizon bat bere etxean erasotzeagatik
Erasotuaren arabera, gizon bat eta emakume bat etxean sartu zaizkio eta pisuaren alokairua ordaintzeko eskatu diote.
Erredakzioa
Ertzaintzak gizonezko bat eta emakumezko bat atxilotu ditu gaur Santutxun. Ustez, gizon bat bere etxean erasotu dute, Segurtasun sailaren arabera.
Etxe horretako bizilaguna bikotekidearekin zegoen erasotu dutenean, eta Basurtuko ospitalera eraman dute anbulantzian, buruan zauri odoltsu bat baitzuen, objektu sendo batek eragina.
Goizeko 10:30 inguruan, Ertzaintzak dei bat jaso du Sagarminaga kaleko etxebizitza batean iskanbilak zeudela jakinaraziz, eta bizilagun bat buruan zaurituta eta odoletan zegoela.
Bertara iritsi ostean, etxe hartan bizi den bikoteak bi pertsona pisuan sartu direla eta eraso egin dietela adierazi die ertzainei. Alokairua ordaintzeko eskatzen zietela gaineratu dute.
Ertzaintzak erasoa egin duten pertsonak bilatzeari ekin dio. 13:30 inguruan, Santutxuko Remigio Gandasegi kaleko jarleku batean eserita, aurrekari polizial ugari dituen 54 urteko gizonezko bat topatu dute, ustezko erasotzaileetako bat.
43 urteko emakume bat toki berera joan da segituan, eta gizonezkoarekin batera atxilotu dute, erasoan parte hartu duela uste baitute.