Atxilotu bat Bilbon, neskalagun ohiaren argazkiak sarean jartzeagatik

35 urteko gizonezko bat atxilotu du Polizia Nazionalak Bilbon, sarean profil faltsuak sortu eta neskalagun ohia biluzik agertzen zen argazkiak bidali eta elkarrizketa sexualak izateagatik.

Hasieran, atxilotuak bere burua bere bikotekide ohia izan balitz bezala aurkezten zuen argazkiak bidali ahal izateko. Geroago, ordea, mezuak bidaltzeko beste profil batzuk sortu zituen Interneten, Poliziak adierazi duenez.

Tenerife hegoaldeko emakume baten salaketak abiarazi zuen ikerketak. Salatzailearen hitzetan, haren gertuko pertsonek, seme adingabea eta klasekideak barne, haren argazki intimoak jaso zituzten, eta erruduna bikotekide ohia izan ote zen susmoa zeukan.

Poliziak jakin zuen mezu guztiak Internetera konexioa zuen mugikor batetik bidaliak izan zirela, eta gizonezkoak emakumea zela esaten zuela.

Geroago, bost profil gehiago ireki zituen sare sozial batean, biktimaren senitartekoei mezuak bidaltzen jarraitzeko.

Gizonezkoa, Bilbon bizi dena, nor zen jakin ostean, Poliziak atxilotu egin zuen, eta etxean zeuzkan mugikor bat eta ordenagailua konfiskatu zizkioten.

Bilboko Antolatutako Delitugintza taldeak Santa Cruz de Tenerifeko Delitu Teknologikoen taldearekin elkarlanean burutu du operazioa.