Tornadoak eta autismoa homosexualen errua dira, politikari baten ustez

Azken asteetan AEBetan gertatzen ari diren hondamendi naturalen errua egotzi die homosexualei Susanne Atanus AEBetako Kongresurako Illinoiseko hautagai errepublikano batek, Daily Herald egunkarian eskaini duen elkarrizketa batean. "Jainkoa haserre dago abortoagatik, ezkontza homosexualengatik eta bikote zibilengatik", esan du.

Atanusen ustez, duela 60 urte ezagutzen ez ziren eta mende honetan sortu diren autismoan eta beste hainbat gaixotasunetan ikus daiteke Jainkoaren haserrea.

"Kristaua naiz. Munduak eta Jainkoari zor diodan obedientziak arduratzen nau. Abortuarekin, homosexualen eskubideekin eta bikote zibilekin ezin dut beste alde batera begiratu", azaldu du hautagaiak.

Jack Dorgan Alderdi Errepublikanoaren Illinoiseko presidenteak esan duenez, Susanne Atanusen adierazpenak "iraingarriak" dira eta ez dute eztabaida politikoan tarterik. "Gure alderdiko buruek ezin dute Atanusen hautagaitza babestu eta bertan behera utzi beharko luke", adierazi du.