Gizartea -
Uztailean okupatu zuten
Ertzaintzak Bilboko 'Erribera 13' eraikina hustu du
Eraikin barruan zeuden gazte batzuk teilatura igo dira, eta Ertzaintzak barruan zeuden pertsona guztiak atera ditu.
Erredakzioa
Ertzaintzak Bilboko Erribera kaleko 13. zenbakiko eraikina hustu du goizeko zazpietan. 'Erribera 13' iazko uztailean okupatu zuten, eta Ertzaintzak eraikina goizeko bederatzietan hustuko zuela ohartarazi arren, bi ordu arinago bertaratu dira agenteak.
Eraikin barruan zeuden gazte batzuk teilatura igo dira, eta Ertzaintzak barruan zeuden pertsona guztiak atera ditu. Ertzaintzaren sei furgoneta joan dira Bilboko Erribera kalera eraikina hustera.
Ertzaintzak epailearen aginduz hustu du eraikina, Segurtasun Sailak ohar batean jakitera eman duenez. Ez da istilurik izan, baina agenteek emakumezko bat atxilotu dute, "agenteei desobeditzea egotzita". Horrez gain, Ertzaintzak hainbat lagun identifikatu ditu.
Gertatutakoa salatzeko, manifestazioa deitu dute Bilboko Unamuno Plazan, 19:00etarako.