Gizon bat atxilotu dute auzokide bat katana batekin mehatxatzeagatik

Ertzaintzako agenteek 57 urteko gizon bat atxilotu zuten asteazkenean Abanto Zierbenan (Bizkaia), eztabaida batean bere auzokide bat katana batekin mehatxatzeagatik, Eusko Jaurlaritzako Segurtasun Sailak adierazi duenez.

Atxilotuak errebolber bat ere atera zuen bere auzokidearekin izandako liskarrean.

Gertakariak astelehenean izan ziren, Abanto Zierbenako Las Carreras auzoan, 18:00ak inguruan. Ertzaintzak atxilotu duen gizonezkoa bere auzokidearengana hurbildu zen (talde batean zegoen) eta berarekin eztabaidatzen hasi zen.

Alde egin eta gero, berriro bueltatu zen, baina katana bat zeramala. Heriotza mehatxuak egin zizkion eta errebolber bat atera zuen.

Ertzaintzak asteazkenean atzeman zuen ustezko erasotzailea, eta, epailearen baimena jasotakoan, haren etxea miatu zuen. Bertan, sei kartutxoz kargatutako errebolber bat, balinezko aire-pistola bat, bolazko beste bat eta 66 zentimetroko xafla duen katana topatu zituzten agenteek.

Atxilotua Barakaldoko Epaitegira eraman zuten asteazkenean, eta armak Ertzaintzaren Polizia Zientifikoaren esku jarri zituzten, azterketa eta analisia egiteko.