Aldi baterako laneko enpresa bati eraso egin diote Iruñean

Aurpegia estalita zuten sei gaztek aldi baterako laneko enpresa bati molotov koktelez eraso diote bart Iruñean, eta, ondorioz, enpresa barruan sutea eragin dute. Suhiltzaileek amatatu behar izan dute.

Espainiako Poliziak jakitera eman duenez, erasoa sei pertsonak egin dute Iruñeko Iturrama kaleko 11. zenbakian dagoen Ananda enpresaren aurka.

Erasoa goizaldeko ordu bata aldera izan da, eta molotov koktelek sutea piztu dute enpresa barruan.

Hala ere, ez da inor zauritu eta enpresaren gainean bizi diren auzotarrak ez dituzte euren etxeetatik atera behar izan.