Aske utzi dute Marbellan hildako umearen ama, beste biak, kartzelara

Marbellako (Malaga) 3 zenbakiko Instrukzio Epaitegiak aske utzi du, baina karguekin, aurreko igandeko goizaldean hil zen haur marokoarren ama. Umeak ubeldura asko zituen gorputzean topatu zutenean.

Gainera, auziarekin lotuta atxilotutako beste bi pertsonak kartzelara bidali ditu epaileak, epaitegitik zabaldu dutenez.

Aipatu iturrien arabera, hasiera batean utzikeria delitu bat egotzi diote amari, eta beste biei, emakumezko bat eta gizonezko bat, tratu txarrak egitea eta giza-hilketa egotzi die. Halaber, zehaztu dutenez, eginbide gehiago betetzeke daude.

Gertaera

Polizia Nazionalak igandean Marbellan (Malagan) hildako adingabearen ama eta bikote bat atxilotu ditu. Malagako udalerrian hil zen eta hainbat zauri zituen adingabeak, tratu txarren kasu bat izan daitekeelakoan.

Ikerketa irekita mantendu dute, poliziako iturriek jakinarazi dutenez, eta atxilotutako hiru lagunek adingabearen heriotzean parte hartu zutela uste dute.

Marokoar jatorria du adingabeak eta iragan igandean hil zen El Barrio deituriko auzoan. 061eko medikuak bertaratu ziren eta gorputz osoan ubeldurak zituela ikusi zuten, hainbat orbain eta erredurak oin batean, SUR egunkariak argitaratu duenez.

Orduan, emakume bat eta bere bikotekidea umea zaintzen zeuden eta adingabea egun batzuk aurretik eskaileretatik erori zela aitortu zuten, egoera txarrera egin zuenera arte, larunbat gauean.

Hainbat ordu beranduago, adingabearen ama aurkitu zuten. Hainbat egun etxetik agertu gabe zegoen eta atxilotu egin zuten.