Gizartea -
Drogaren aurkako operazioa
110 kilo marihuana atzeman dituzte Murtzian
Poliziak bi espainiar eta bi britainiar atxilotu ditu. Miaketan 74 kilo kukulu eta 294 pilula haxix atzeman dizkiete.
Erredakzioa
Polizia Nazionaleko agenteek 110 kilo marihuana atzeman dituzte Murtzian, Erresuma Batura bidaltzeko prest. Espainian inoiz atzeman duten droga-kargamenturik handienetarikoa da, eta lau pertsona atxilotu dituzte.
Poliziak aditzera eman duenez, ikerketa urtarrilean hasi zuten, Espainian haxix kantitate handiak erosi eta Erresuma Batura bidaltzen zituen talde bat zebilela jakin zutenean.
Ikerketen ondorioz jakin zutenez, droga Granadan eta Murtzian erosten zuten, eta, bidali aurretik, atxilotuetako baten etxean prestatzen zuten. Ondoren, kamioietan sartzen zuten, legezko zamaren artean ezkutatuta, eta Erresuma Batura errepidez eramaten zuten.
Agenteak zaintza-lanetan hasi ziren, eta, horri esker, taldeko kideak identifikatu eta atxilotu dituzte: bi espainiar eta bi britainiar. Granadatik Murtziara 36 kilo marihuana zeramatzatela harrapatu dituzte.
Horiek atxilotu ostean, Murtzian zeukaten etxebizitza miatu dute, eta 74 kilo marihuana, 294 haxix pilula (56 kilo), 11.000 euro, zilindrada handiko bi ibilgailu eta droga prestatzeko hainbat tresna aurkitu dituzte bertan.
