Gizartea -
Mafia eta armen trafikoa
Errusiar bat atxilotu dute Gironan, 33 hilketa leporatuta
Dmitry Z. ustezko mafiosoak Ukrainako pasaportea eta Belgikako egoitza txartela (D.K. izenarekin) zeramatzan. Armen eta leherkarien trafikoa egiten duen erakunde batekin lotura du atxilotuak.
Erredakzioa
33 hilketa leporatuta, errusiar bat atxilotu du Guardia Zibilak Jonquerako (Girona) aduana-kontrol batean. Antza denez, legez kanpoko armen eta leherkarien trafikoa egiten duen erakunde kriminal batekin lotura du atxilotuak.
Guardia Zibilak jakitera eman duenez, Dmitry Z. Errusiako gaizkilearen aurka nazioarteko atxilotzeko agindua zuten, gutxienez 33 krimenetan inplikatuta zegoelako.
Frantziako Poliziak 'Maruqa' operazioan lagundu du. Gizonak emakume errusiar batekin harremana zuen Frantzian. Costa Bravara bidaia bat egin behar zuten biek.
Guardia Zibilak emakumearen etxea Empuriabravan (Girona) aurkitu zuen. Maiatzaren 16an ustezko hiltzailea eta haren bikotekidea etxean atzeman zituzten, eta baita adingabe bat ere. Aurpegierak nazioarteko aginduko gizonarekin antza handia zuen.
Horrela, etxebizitza zelatatu zuten ikertzaileek. Susmagarria Castello d'Empuries utzi eta Frantziara abiatu zen. Poliziek Jonquerako mugan kontrola egitea erabaki zuten.
Agiri faltsuak
Ustezko mafiosoak Ukrainako pasaportea eta Belgikako egoitza txartela (D.K. izenarekin) zeramatzan. Agiri faltsuak izan zitezkeen, eta Interpolen bidez hatz-markak egiaztatu zituzten poliziek. Gaizkilea zela baieztatu zuten.
Guardia Zibilak atxilotua Auzitegi Nazionalaren esku utzi du eta espetxera bidali dute.