Gida-baimena kendutako motorzale bat larri zauritu da Zarautzen

37 urteko motorzale bat larri zauritu da gaur Zarautzen, Eusko Jaurlaritzako Segurtasun Sailak aditzera eman duenez. Gizonezkoak, gainera, gida-baimena erretiratuta zeukan urte amaierara arte.

Ezbeharra goizeko zazpietan izan da, Zarautz eta Urteta auzoaren arteko GI-3791 errepidean. Honda motoak BMW ibilgailu baten aurka egin du talka. Motorzaleak zauri larriak izan ditu, eta Donostiako ospitalera eraman dute anbulantzian.

Epaile baten aginduz, 2014. urte amaierara arte gida-baimena kenduta zeukan; beraz, Ertzaintzak gogorarazi duen moduan, erabaki judizial hura hautsi du.

Bizkaian beste moto istripu bat izan da gaur. Armintzatik Bakiora doan BI-3152 errepidean, 56 urteko gizonezko bat eta emakumezko bat arin zauritu dira, gidatzen zihoazen Hyosung Aquila mototik erori ostean.