Gizartea -
Ezbeharra
Adineko gizon bat hil da Irunen, gurpil-aulkian erreka batera erorita
Autopsiak argituko du 76 urteko gizonezkoa erortzean hartutako kolpeagatik edo erorikoa eragin duen arazoren bategatik hil den.
Erredakzioa
76 urteko Irungo bizilagun bat hil da gaur, haren gurpil-aulkiarekin herriko erreka batera erorita, Segurtasun Sailak jakinarazi duenez.
14:30 aldera, Irungo herritar batek larrialdi zerbitzuei deitu die, gizon bat Meaka auzoko erreka batera erori dela esanez.
Bertara gerturatu dira Ertzaintza, Irungo Polizia eta suhiltzaile talde bat, baina ezin izan dute gizonezkoaren bizitza salbatu.
Adinekoa bidegorritik bi metrora dagoen Meakako errekara erori da gurpil-aulki elektrikoan zihoala.
Segurtasun Sailetik adierazi dutenez, autopsiak argituko du 76 urteko gizonezkoa erortzean hartutako kolpeagatik edo erorikoa eragin duen arazoren bategatik hil den.