Gizartea -
93 egun eta 15 orduko uda
Uda gaur hasi eta azken mendeetako urtarorik luzeenetakoa izango da
12:51n, udan sartu gara, eta irailaren 23ra arte luzatuko da. Done Laurendiren malkoak -edo Pertseidak- abuztuaren 12an ikusi ahal izango dira, eta urtaro honetan ez da eklipserik egingo.
Erredakzioa
Uda astronomikoa gaur, larunbata, hilaren 21ean, hasi da, eguerdiko 12:51n, Geografia Institutu Nazionalaren (IGN) arabera, eta azken mendeetan izandako udarik luzeenetakoa izango da, 93 egun eta 15 ordukoa; udazkena heldu arte, irailaren 23an.
Gainera, Done Laurendiren malkoak -edo Pertseidak- izar jasa ospetsua abuztuaren 12an ikusi ahal izango da, baina aurten ez da aurreko urteetan bezain garbi ikusiko, ilargia ia betea egongo baita. Bestalde, gaur hasiko dugun urtaro honetan ez da eklipserik egingo; ez Eguzki eklipserik ezta Ilargi eklipserik ere.
Adostuta dago udari hasiera ematea Lurra leku jakin batzuetara heltzen denean, Eguzkiaren inguruko orbitan.
Udako solstizioa urteko egunik luzeenean izaten da, eta data horren inguruan urteko gainerako egunetan baino goizago argitu eta beranduago iluntzen du.
Gainera, garai honetan da urte osoan Lurra Eguzkitik urrunen dagoen momentua, hau da, Afelioaren eguna. Horregatik Lurra motelago mugitzen da orbitan (Keplerren hirugarren araua), eta, hori dela eta, luzeagoa izaten da urtaroa.
IGNren arabera, udako lehenengo ilbetea uztailaren 12an izango dugu, eta ondoren beste bi izango dira: abuztuaren 10ean eta irailaren 9an.
