Gizartea -
Gertakaria
Adingabe bat atxilotu dute Trapagaranen aurkitutako gorpuarekin lotuta
Trenbidearen aldamenean hilik topatu zuten gaztearen heriotzarekin zerikusia ote duen ikertzen ari dira.
Erredakzioa
Ertzaintzak adingabe bat atxilotu du Bizkaian, Trapagaranen hilik aurkitu zuten gaztearen heriotza argitzeko ikerketaren baitan, eta adingabeak zerikusirik izan ote duen argitzeko lanetan dihardute.
Eusko Jaurlaritzaren Segurtasun Sailak jakitera eman duenez, gaztearen gorpua ekainaren 26an aurkitu zuten, eta hasiera batean trenak oharkabean harrapatu zuela pentsatu zuten.
Gero, ordea, bertan aurkitutako frogekin, heriotzarekin zerikusia izan dezakeen beste norbait zegoela egiaztatu zuten.
Beste pertsona hori adingabea zela egiaztatu ostean, Adingabeen Fiskaltzarekin jarri ziren harremanetan, eta horrek hartu zuen instrukzioaren eta ikerketaren ardura.
Hala, atzo adingabe bat atxilotu zuten, susmagarria bera zelakoan. Orain, adingabeen zentro batean sartu dute behin behineko neurri gisa, eta auziaren sumarioa sekretupean dago.