Gizartea -
D'Agostino-Panella klanekoa
Napoliko Camorrako kide bat atxilotu dute Eivissan
Hura bilatu eta atxilotzeko euroagindu bat betetzeko hartu du preso Poliziak, gaizkile talde bateko kide izatea, armekin trafikatzea, mehatxuak eta sutea egitea leporatuta.
Erredakzioa
Espainiako Polizia Nazionalak Adamo Pisapia Napoliko (Italia) Camorrako kidea atxilotu du Eivissan, hura bilatu eta atxilotzeko euroagindu bat betetzeko. D'Agostino-Panella klaneko kidea omen denari gaizkile talde bateko kide izatea, armekin trafikatzea, mehatxuak eta sutea egitea leporatu diote.
Salernoko (Italia) 53 urteko gizonezkoa da, eta operazioa Salernoko Poliziarekin elkarlanean burutu dute. Duela hilabete batzuk jakin zuen Poliziak atxilotu berri duten hori Eivissan bizi dela.
Zenbait ikerketaren ondoren, agenteek Pisapia topatu eta operatiboa prestatu zuten, hura etxean atxilotzeko helburuarekin.
Atxilotutakoari egotzi dizkioten delituak 1990 eta 2002 bitartean egin zituen, ustez, Salernon. Garai hartan Salernon jardun zen mafiaren taldeko kide izatea leporatu diote Pisapiari, D'Agostino-Panella klaneko kide izatea, alegia.