Gizartea -
Ebola
Basurtuko gaixoak ez du ebola
Mediku azterketek erakutsi dute ebola zuelakoan ospitaleratutako gizonak ez duela gaixotasun kutsakor hori.
Erredakzioa
Birusaz kutsatuta egon zitekeelakoan Bilbon Basurtuko ospitalera eramandako gaixoak ez du ebola, Eusko Jaurlaritzako Osasun Sailak jakinarazi duenez. Gaixoari egin dizkioten mediku azterketek erakutsi dute ez dagoela birusaz kutsatuta.
Mediku azterketen arabera, Sestaon bizi den 38 urteko gizonezkoak malaria gaitza dauka, eta dagoeneko tratamendua jarri diote.
Ebola izan zezakeen beldur, birus kutsakorrari zegokion protokoloa ezarri zuten atzo Basurtuko ospitalean. Aipaturiko gizona sortzez nigeriarra da eta duela gutxi itzuli zen handik Euskal Herrira. Hainbat egunez sukar handia izan du, eta, Nigeria ebola zabaldu den herrialdeetako bat izaki, beharbada birusa zeukala pentsatu zuten medikuek.
