Bi lagun atxilotu dituzte Gasteizen, mozkortuta gidatzeagatik

26 eta 29 urteko bi gizonezko atxilotu dituzte bart Gasteizen. Biak ala biak mozkortuta zeuden Udaltzaingoak atzeman dituenean, eta aurrez istripua izan dute autoarekin. Ezbeharra gertatu den unean autoa gidatzen ari zirela esan dute biek ala biek.

Udaleko iturriek EFE albiste agentziari azaldu diotenez, gertakaria 00:39an jazo da, Itinerario de Antonino kalean, Gasteizen.

Hiru lagun zihoazen autoa bidetik irten da eta hiri-altzarien kontra jo du. Udaltzainak gidaria identifikatzera joan direnean, istripua jazo den unean autoa gidatzen zihoazela esan dute bidaiarietako bik. Biak ala biak mozkortuta zeuden, eta, hori dela eta, polizia-etxera eraman dituzte, gertatutakoa argitze aldera.

Bi lagunek positibo eman dute alkoholemia-proban; aire-litroko 0,65 eta 0,62 miligramo alkohol atzeman diete.

Udaltzainek gerora ondorioztatu dutenez, istripua gertatu den unean 29 urteko gizonezkoak gidatzen zuen autoa.