Hiru atxilotu eta sei zauritu monarkiaren aurkako protestan, Madrilen

Polizia Nazionalak hiru lagun atxilotu ditu agintarien aurkako atentatua egotzita, 25-S koordinatzaileak antolatutako monarkiaren aurkako protesta batean parte hartzeagatik. Puerta del Sol eta inguruetan izan da protesta eta sei zauritu arin utzi ditu, tartean hiru polizia.

Espainiako Gobernuko Delegaritzak ez du manifestazioaren berri izan (Puerta del Sol inguruan hasi da) eta hainbat lagunek protesta egin dute, "Jardunbide konstituziogileak orain, monarkia ez da demokrazia, diktadura eta ustelkeria da" zeritzon pankarta baten atzean. Enparantza horretan (Madrilgo Erkidegoaren egoitza dago bertan), horrelako kartelak erakutsi dituzte manifestariek: "Monarkia, bertan behera", "Rajoy eta Mas kanpora", "Benetako Trantsizioa, Erregerik gabe" eta "Demokrazia erregeekin, Porschea idiekin".

Hitzaldi motz baten ostean, Alcala kaletik behera joan dira manifestariak (Diputatuen Kongresura bidean), baina poliziak bultza egin die Puerta del Solera heldu baino metro batzuk lehenago. Orduan, "zapaltzaile" deitu eta hainbat minutuz mezuak bota ostean, inguruetatik barreiatu dira.

Hiru lagun atxilotu dituzte protestetan -bi emakume eta gizonezko bat-, Alcala kalean, agintarien aurkako atentatua egotzita, polizia iturrien arabera. Samur-Babes Zibileko iturrien arabera, sei zauritu arin izan dira -tartean hiru polizia, lekuan bertan alta eman zietelarik- eta bi lagun soilik eraman behar izan dituzte ospitalera.

Deialdi berria

25S koordinatzaileak deialdi berri bat egin du iganderako, 19:00etan Madrilgo Puerta del Solen, "atxilotutako eta zauritutako lagunekin elkartasuna adierazteko, eta Estatuaren zapalkuntza bortitza gaitzesteko".

"Alderdi politikoak, sindikatuak eta beste elkarteak bertaratzea espero dugu, diktadura monarkikoaren inguruan isilik mantentzen baitira", azaldu dute agiri batean.

Larunbateko deialdiari dagokionean, honakoa adierazi dute: "15 minutu baino ez ziren behar izan poliziak (kaskoak, borrak, txalekoak eta pistolak zituztela) manifestari talde baten aurka egiteko, soilik demokrazia eskatzen zuten manifestarien aurka".