54 lagun atxilotu dituzte haur pornografia partekatzea egotzita

Espainiako Poliziak 54 lagun atxilotu ditu haur pornografia partekatzea eta nesken komunetan grabatzea egotzita. Hiru atxiloketa Bizkaian egin dira, eta bat, Donostian.

Poliziaren Zuzendaritza Nagusiak jakinarazi duenez, Estatuko hainbat probintziatan egin dituzte atxiloketak. Ustezko pedofiloek adingabeen irudiak partekatzen zituzten. Irudiok nesken komun publikoetan edo fisioterapeuta baten kontsultan grabatzen zituzten.

Hain justu, atxilo hartutakoen artean emakumezko pazienteak biluzik edo barruko arropan grabatzen zituen Madrilgo fisioterapeuta bat dago. Sevillan, berriz, bainu publiko batzuetako komunetan sartutako minikamera batekin grabatzen zituzten adingabeen irudiak.

Bi polizia operazioren ondorio dira atxiloketak. Poliziak  P2P (peer-to-peer) sareak (irudiak partekatzeko, banatzeko eta deskargatzeko sareak) arakatu ditu. Atxilotutako 10 lagun haur pornografia zuten txatetan ibiltzen ziren, beste herrialde batzuetako ustezko pedofiloekin irudiak partekatzeko.

Informazio guztia aztertu eta gero, 21 lagun atxilotu eta beste hainbeste etxebizitza miatu ditu Poliziak. Probintzia hauetan egin dituzte atxiloketak lehen operazio honetan: Madril (5), Murtzia (3), Bartzelona (2), Malaga (2), Tenerife (1), Zaragoza (1), Valentzia (2), Burgos (1), Coruña (1), Alacant (1), Gipuzkoa (1) eta Sevilla (1).

Bigarren operazio batean, beste 33 lagun hartu dituzte atxilo: Bartzelonan, 9; Bizkaian eta Valentzian, 3na; Coruñan, Alacanten eta Tarragonan, 2na; eta bana Ciudad Realen, Gironan, Huescan, Cadizen, Sevillan, Valladoliden, Zaragozan, Leonen, Madrilen, Kordoban, Salamancan eta Tenerifen. Atxilotutako 33 lagunetatik 9 aurretik ere atzeman dituzte tankerako delituak egotzita.