Gizartea -
Zazpi istripu izan dira
Euriak arazo ugari eragin ditu EAEko errepideetan
Ertzaintzak eitb.eus-i azaldutakoaren arabera, zazpi istripu jazo dira egunaren lehenengo orduetan: hiru pertsona zauritu dira eta auto-ilara luzeak izan dira hainbat puntutan.
IKER GOMEZ / EITB.EUS
Arazo ugari izan dira gaur goizean Euskal Autonomia Erkidegoko errepide nagusietan euriaren eraginez. Ertzaintzak eitb.eus-i azaldutakoaren arabera, zazpi istripu jazo dira egunaren lehenengo orduetan: hiru pertsona zauritu dira eta auto-ilara luzeak izan dira hainbat puntutan.
AP-8an, Mendaron, Bilboko noranzkoan, hiru ibilgailuk talka egin dute eta pertsona bat zauritu da. Ondorioz, bi kilometroko auto-ilarak izan dira goizeko lehen orduetan. Ertzaintzak errei bat itxi du.
A-8an, Bilboko Abusu auzoan, ibilgailu bat errepidetik atera eta gidaria zauritu da. Horrez gain, auto-ilara luzeak izan dira istripua izan den puntuan.
Bestalde, BI-636 errepidean, Zallan, bi autok talka egin dute: pertsona bat zauritu da.
A-8an, Retuerton, zazpi ibilgailuk elkar jo dute eta bi kilometroko auto-ilarak izan dira.
A-15ean, Elduainen, furgoneta bat irauli da eta gidaria ospitalera eraman behar izan dute.
Azkenik, Arrigorriagan, AP-68an, bi istripu izan dira puntu berean. Bi auto errepidetik atera dira, Ertzaintzak jakitera eman duenez.
