PSGko bi zale labankadaz zauritu dituzte Bartzelonan

Paris Saint-Germain (PSG) futbol taldeko zale bat labankadaz zauritu zuten bart Bartzelonan, Camp Nou estadioaren inguruetan. Atzo, Bartzelonak eta Parisko taldeak Txapeldunen Ligako neurketa jokatu zuten bertan.

Albert Batlle Esquadra Mossoen zuzendariak gosari informatibo batean azaldu duenez, burua estalita zeramaten bi lagunek atzetik eraso zieten hiru zale frantziarri, Madril hiribidean, eta horietako bati labana sartu zioten bularrean.

Lekukoen arabera, erasotzaileek aurpegia estalita zuten, eta, ondorioz, ez lekukoek ez biktimaren lagunek ezin izan dituzte identifikatu. Horien esanetan, aurrez ez zen borrokarik izan eta erasoa "ustekabean" gertatu zen.

Biktimak birika inguruan jaso zuen sastada, baina egonkor eta arriskutik kanpo dago, ospitalean.

Esquadra Mossoak bigarren eraso bat ikertzen ari dira

Esquadra Mossoak Camp Nou inguruan PSGko beste zale baten kontra egindako erasoa ere ikertzen ari dira. Antza denez, hori ere labankadaz zauritu zuten.

Iturri ofizialek zabaldu dutenez, Bartzelona eta PSGren arteko partida amaitu eta ordu erdiko tartean, PSGko bi zaleren kontrako bi eraso izan ziren estadioaren inguruetan. Esquadra Mossoek ikerketa abiatu dute bi eraso horien artean loturarik den argitzeko.

Bigarren erasoa 23:00ak aldera gertatu zen, talde batek Camp Noutik atera berri ziren hiru zale frantziarri eraso zienean. Horietako bati labankada eman zioten, gainera. Zauritua osasun zentro batera eraman zuten, baina medikuek dagoeneko senda-agiria eman diote.

Bigarren erasoa lehenengoa izan zen tokitik gertu izan zen, eta, horregatik, Esquadra Mossoak bi erasoen arteko balizko lotura ikertzen ari dira. Dena den, ez dute baztertu lapurreta saiakera bat izan izana.