16 urteko zigorra, 'Izurdia' ontziari eraso zioten piratei

Auzitegi Nazionalak 16 urte eta erdiko kartzela-zigorra ezarri die ‘Izurdia’ atun-ontziari tiroz eraso zioten sei piratei. Gertakariak 2012ko urriaren 10ean jazo ziren, Somaliako uretan. Piratak ontzia bahitzen saiatu ziren, baina azkenean ihes egin behar izan zuten. Biharamunean, Herbehereetako Armadaren ontzi batek atzeman zituen.

Auzitegi Nazionalaren Zigor-arloko 3. Salak frogatutzat eman du sei auzipetuak (Adawe Yusuf Ali, Abdi Ali Salad, Abdilahi Ise Jama, Yahye Omar Ali Hasan, Ali Mahamed Ali eta Ali Mahamed Hirsi) erakunde kriminaleko kide direla eta euskal arrantza-ontziari eraso ziotela.

Epaiaren arabera, Somaliako kostaldean nabigatzen duten ontziak bahitzea da erakunde horren helburua, ondoren erreskatea eskatu eta dirua lortzeko. Gainera, auzipetuek antzeko beste ekintza batzuetan parte hartu izan dutela ondorioztatu dute bertan.

Erasoak gauzatzeko “suntsipen handiko armak” eta motordun ontzi txiki azkarrak erabiltzen zituztela jaso du ebazpenak, eta erakunde kriminala ondo egituratuta zegoela eta bakoitzak bere jarduna ondo zehaztuta zuela nabarmendu du.