Gizartea -
Istripua
Auto bat sartu da Oiartzungo supermerkatu batean
Langile bat arin zauritu da. Mamut merkataritzagunean jazo da, Alcampo supermerkatuan.
eitb.eus
Auto bat sartu da Alcampo supermerkatu batean gaur goizean, Oiartzungo (Gipuzkoa) Mamut merkataritzagunean, gidariak ibilgailuaren kontrola galdu baitu, Oarsoaldeko Hitza-k jakinarazi duenez.
Istripuaren ondorioz, bertako langile bat zauritu da. Ez dago larri, baina, badaezpada, Donostia Ospitalera eraman dute.
Ibilgailuaren gidaria ere onik dago, baina artatu behar izan dute, oso urduri baitzegoen.
Udaltzaingoaren esanetan, istripua 10:45ean gertatu da. Ordu horretan, gidariak, gizon edadetu batek, ibilgailua bizkortu egin du bihurgune batean, balaztatu beharrean, eta, ondorioz kontrola galdu du eta supermerkatuan sartu da.
Istripuak kalte material handiak egin ditu, bai dendan, bai autoan.
Argazkia: 'Oarsoaldeko Hitza'