Gizartea -
Trafikoa
Hiru lagun zauritu dira Zornotzan izandako istripu batean
Kamioi batek eta hiru autok talka egin dute N-634 errepidean. Ondorioz, auto-ilara luzeak sortu dira.
Agentziak | Erredakzioa
Hiru lagun zauritu dira gaur goizean N-634 errepidean Zornotzan (Bizkaia), Eusko Jaurlaritzako Segurtasun Sailak eitb.eus-i jakinarazi dionez.
Argitu gabeko arrazoiak direla eta, kamioi batek eta hiru autok talka egin dute. Ezbeharraren ondorioz, auto-ilara luzeak izan dira bi orduz.
Istripua 07:30ean jazo da, 89. kilometroan, Eubako industrialdearen parean. Zauritutako hiru lagunak Galdakaoko Ospitalera eraman dituzte.
Ezbeharraren ondorioz, erreietako bat zirkulaziorako itxi behar izan dute, eta 10:00etan auto-ilarak zeuden oraindik bi noranzkoetan, zirkulazioa txandaka bideratzen aritu direlako.
