Langileen esplotazioagatik Mendabian atxilotuetako bat, espetxera

24 urteko jatorri portugaldarreko eta Mendabiako bizilaguna den gizonezko bat espetxera bidali du larunbat honetan epaileak, langileak esplotatzen zituen sare bateko burua izatea leporatuta.

Nafarroako Foruzaingoak lau gizonezko eta bi emakumezko atxilotu zituen asteartean Mendabian -bost portugaldar eta espainiar bat- pertsonen salerosketa leporatuta, Nafarroako Gobernuak jakitera eman zuenez. Pertsona horiek lanean esplotatzeko erabiltzen omen zituzten.

Sare horretako ustezko buruak 24 urte ditu eta jatorriz portugaldarra da.

Antza denez, gizon hori nekazaritzako eta abeltzaintzako lanak topatzeaz arduratzen zen eta, gero, sasoikako langileak aurkitzen zituen -gehienetan portugaldarrak-. Gainera, ostatua eman eta mantenua ematen zien, baina oso baldintza txarretan. Horretarako, haren 27 urteko arrebaren laguntza izaten zuen, eta bera ere atxilotuen artean dago.

Ikerketaren arabera, buruak menperatze harreman bat zuen langileekin; izan ere, irabazten zuten diruaren zati bat berari ematera behartzen zien. Halaber, langileen posta eta bankuko dokumentazioa bereganatzen zituen, are gehiago, bankuko libreta kentzen zien.

Ildo horretan, langileak oso egoera txarretan bizi ziren, besteak beste, ez zuten ur berorik ere.

Lizarrako 1. instrukzio epaitegiko epaileak gidatu du ikerketa eta espetxera bidali du sei atxilotuetako bat.