8.000 gidari baino gehiago geratu da gidabaimenik gabe EAEn, 2006tik

Guztira 8.205 gidarik galdu du gidabaimena Euskadin duela bederatzi urte (2006an) puntukako gidabaimena indarrean sartu zenetik.

Kopuru hori Euskadin dauden gidarien % 0,67 da; horrek esan nahi du Estatuko bataz bestekoa baino % 0,11 gutxiago dela. Horrela adierazi du Adolfo Peñarandak (Bizkaiko trafikoko probintzia-burua) gaur goizean eman duen prentsaurrekoan.

Lurraldeka, Bizkaian 4.504 gidari geratu ziren baimenik gabe (gidari-erroldaren % 0,72); Araban, 1.206 (% 0,65), eta Gipuzkoan, 2.495 (% 0,61).

Gidabaimena kentzeko arrazoi nagusia gehiegizko abiadura da, eta horren atzetik datoz alkoholaren eta drogen eraginpean gidatzea. 35 eta 55 urte bitartekoak dira arau-hauste horiek gehien egiten dituzten gidariak (% 55).

Aitzitik, adin-tarte gazteena dutenek, hau da, 24 eta 34 urte bitarteko gidariek, alkohola edategatik edo drogak hartzeagatik puntuak galdu dituztenen % 20 besterik ez dira.

Peñarandak azaldu duenez, 2006tik hona gidabaimena galdu duten pertsonen eboluzioak gora egin zuen 2010era arte; aldiz, ondoren, behera egin du. Haren aburuz, horren arrazoia zera izan zen: puntukako sistemak dakartzan zigor administratibo eta ekonomikoen nondik norakoak hasieratik ez ezagutzea.

Une honetan, Euskadin 2.500 gidari baino gehiago daude punturik gabe: horietako 1.315, Bizkaian; 753, Gipuzkoan, eta 441, Araban.