Euskal nerabeak 15 urterekin hasten dira alkoholean eta sexuan

EAEko nerabeek 14,8 urterekin hartzen dute euren lehendabiziko tragoa, eta 15 urterekin erretzen dute hasierako zigarroa edota porrua; adin berarekin izaten dute hastapeneko sexu-harreman osoa.

Hala adierazten du Eusko Jaurlaritzako Enplegu eta Gizarte Gaietarako Sailak landutako Euskadiko haur eta nerabeen errealitatea zifratan. 2014txostenak.

Dokumentu horren arabera, tabakoaren eta haxixaren kontsumoak 7 eta 5 puntu jaitsi dira, hurrenez hurren, 2008 eta 2010 urteen artean. Gainerako legez kontrako drogek presentzia urriagoa dute eta berantiarragoa.

Azken urteetan hazi egin da edaten duen gazteen ehunekoa (15 eta 19 urte bitarteko gazteen % 77,1ak egiten du), baina ohiko kontsumoa eta arriskutsua dena (asteburuekin lotutakoa) jaitsi egin da.

Sexua

Sexuari dagokionez, lehendabiziko sexu-harreman osoaren batez besteko adina 15 urtekoa zen 2006an (txostenaren erreferentzia oraintsukoena). 14 eta 17 bitarteko hamarretik hiru gaztek erabateko sexu-harremanak izan dituzte.

Antisorgailuen erabilera igo egin da, eta hamarretik bederatzi gaztek preserbatiboa erabiltzen dute edota pilula hartu. Aitzitik, gazte horietako % 4,5ak sexu arriskutsua izan dute (babesik gabeko harremanak edota onartu gabekoak), alkohola edo drogak hartu ostean.

Abortua eta homosexualitatea naturaltasunez hartzen dira euskal gazteen artean, eta % 15 eta % 9 besterik ez daude haurdunaldia etetearen eta homosexualen arteko ezkontzen aurka, hurrenez hurren. Alabaina, oraindik ere badirau drogazaleen, ijitoen, preso ohien kontrako aurreiritziak.

Nerabeek garrantzia handia aitortzen diote itxura fisikoari, euren gizarteratzea eta arrakasta soziala baldintzatzen baitu, batez ere nesken kasuan. Horren ondorioz, 15 eta 24 urte bitarteko hamarretik sei gazte bakarrik daude pozik haien pisuarekin.