Kartzelatu egin dute ustez aita hil zuen gaztea

Aita hiltzea egotzita ostegunean Donostian atxilotutako 25 urteko gaztea kartzelatu egin dute ostiral arratsalde honetan, Eusko Jaurlaritzako Segurtasun Sailak jakitera eman duenez.

Hain zuzen ere, Martuteneko espetxean sartu dute, 19:30ean.

Ostegunean jazo zen gertakari larria, arratsaldeko 16:30 inguruan, Donostiako Buenavista hiribidean, Berrabehea kalean. 48 urteko gizonezko bat ustez semeak hil zuen, labankadaz. Lepoan eta bularrean zituen zauriak biktimak.

Ustez aita hil ondoren, semeak berak deitu zuen larrialdi zerbitzura. Ertzaintzak erasoa izan zen lekuan bertan atxilotu zuen gaztea.