Amantala jantzi eta euskal sukaldaritzan murgildu da Telegraph

Donostia gastronomiaren gunea al da sukaldaritza zaleentzat? Ideia horren inguruan aritu da Xanthe Clay Telegraph egunkariko gastronomia zutabegilea bere azken artikuluan.

Bertan azpimarratu duenez, Gipuzkoako hiriburua da mundu mailan per capita Michelin izar gehien dituen lurraldea; horrez gain, eta hau ez da berria nazioarteko argitalpenetan, pintxoen eta horiek jakiteko tabernen kalitatea aipatu du. Zalantzarik ez dago euskal sukaldaritzak lekua lortu duela nazioarteko prentsan, eta asko direla gure gastronomia jorratu dutenak.

Hala, New York Times egunkariak txakolina izan du hizpide, eta Hondarribiko gastronomia goraipatu du. Donostian bertan, abuztuak 31 kalea aipatu izan dute mundu mailako onenen artean. Orain, baina, pausu bat haratago doa tendentzia, eta gurera datozen profesionalek ez dute bakarrik eskaintza dastatu nahi. Telegraphek berak, adibidez, amantala jantzi du gure gastronomia barru barrutik ezagutzeko.

Horretarako, Xanthe Clay zutabegileak San Sebastian Food egitasmora jo du. Maria Cristian hotel ezagunean dago kokatuta, eta, besteak beste, dastatze-klub batean parte hartu eta sukaldaritza ikastaroak egiteko aukera eskaintzen du. Sei urte daramatzate lan horretan, eta, bertatik azaldu digutenez, interesa piztu du gastronomia munduko blogero eta kazetarien artean.

Clayk bere artikuluan azaltzen duenez, Bretxa azokan hasten da bista. Bertan, Getariako tomateak eta Tolosako babarrunak ezagutzeko aukera dute, ''hiru aldiz garestiagoak baina, behin sukaldatuta, burdeos kolore bereziekin''. Harakinekin eta arrain-saltzaileekin hartu-emanak izan zituen bisitan; besteak beste, kokotxak zer diren ikasi zuen, eta ''zaporik onenak arrosa kolore zurbila'' duela.

Sukaldera itzulita, menua egitea zen hurrengo erronka: zainzuriak, haragia, txipiroiak eta pantxineta. ''Kipula eta piper berde eta gorria moztu genituen, ikurrinaren koloreekin ongailua sortuta horrela'', azaltzen du.

Azkenik, mahaian eseri eta egindako probatzea zen saria. ''Jan-edanaz gain, beharbada, garrantzitsuena ere egin genuen: hitz egin'', azpimarratu du Clayk. Gidak azaldu zienez, gastronomiarekiko lotura ez baita bakarrik jatetxeetara joatea: ''Sozializatzeko modu bat da''.