Hiru etorkin topatu dituzte kamioi batean ezkutatuta, Hernanin

Hiru etorkin topatu dituzte gaur, asteartea, oxigeno gabezia eta hipotermia zantzuak zituztela, hozkailu-kamioi baten barruan, Hernani herri gipuzkoarraren parean dagoen zerbitzugune batean.

Segurtasun Sailak jakinarazi duenez, 18:40ean aurkitu dituzte hirurak, kamioiak geldialdia egin eta gero, AP-8ko zerbitzugune batean, Madrilerako noranzkoan, eta beste ibilgailu bateko gidariak barrutik zetozen oihuak eta kolpeak entzun dituelako.

Gidari horrek hozkailu-kamioiaren (Poloniatik zetorren) gidariari abisua eman eta biek Ertzaintza jakinean jarri dute.

Hala, agenteek kamioiaren atea zabaldu eta hiru gizonezko aurkitu dituzte, oxigeno gabezia eta hipotermia zantzuak zituztela; hori dela eta, Donostiako Ospitalera eraman dituzte.

Hiru etorkinak agertu diren kamioia. Argazkia: EFE

Osakidetzak jakinarazi duenaren arabera, hirurak onik daude, baina zaintzapean jarraituko dute Donostiako Ospitalean datozen orduotan.

Izan ere, Ertzaintzak zehaztu duenez, hozkailu-kamioiaren atzeko partean 10 graduko tenperatura izan ohi da.

Kamioia Belgikan bete zuten, fruta zeraman eta Mercamadridera zihoan, aipatutako iturrien arabera.