Donostiarrek sakelakoaren bidez ordaindu ahal izango dute TAOa

Donostiarrek TAO ordaindu ahal izango dute sakelako telefonoaren bidez

Ordainketa telefonoaren bidez egiteko aukera emango dute, beraz, edozein lekutik ordaindu ahal izango da eta ez da beharrezkoa izango autoan ordainagiria uztea.

Pilar Arana Mugikortasun eta Garraioko zinegotziak sakelako telefonoetarako aplikazioa aurkeztu dute gaur, asteartea, goizean. Aplikazio horri esker, donostiarrek Araututako Aparkaldi Zerbitzua – TAO – ordaindu ahal izango dute sakelako telefonoarekin. Orain arte, TAOa makinetan ordaintzen zen txaponekin edo txartelarekin, baina aitzitik, azaroaren 25etik aurrera aplikazioak TAOren erabiltzaileei hainbat zerbitzu gehiago eskainiko dizkie. Aranaren arabera, “sistema berri honek egun dagoena osatzen du eta, horrenbestez, Donostiak aurrerapausoa egingo du TAO zerbitzua hobetzeko. Nahikoa da Smart-phone bat edukitzea eta EYSAMobile aplikazioa eskuratzea – Android eta IOS sistementzako aplikazioa da – TAOa sakelako telefonoarekin ordaintzeko. Horretarako, erabiltzaileek izena eman beharko dute eta ordainketa modua zehaztu: aurrekarga, hau da, diru-poltsa elektroniko baten antzeko sistema, edo kontu korrontea, hau da, hilabetero kontsumoa likidatzea. Eta hori guztia, makinatik pasa gabe”.Bestalde, Ugaitz Goñi EYSA enpresako ordezkariak aplikazioaren erakustaldia egin du eta, adierazi duenez, “aplikazioa ez dago matrikula bakar batera lotuta, baizik eta ibilgailu bat edo gehiagorekin eta sistema duten hiri guztietan erabili daiteke, besteak beste, Burgos, Madrid edo Salamanca. Gainera, aplikazioak, besteak beste, honako informazioa ematen du: tarifak, aparkatzeko guneak eta aparkatzeko denbora mugak. Beraz, hiritarrek aparkatzeko baldintzak kontsultatu ahal izango dituzte makinara joan edo langile bati galdetu gabe”.