Arazo elektriko batek metro zerbitzuari eragin dio Arizen (Basauri)

07:30 aldera, arazo bat izan dute metroko argindarraren hornidurarekin, eta matxurak zerbitzuari eragin dio Ariz aldean (Basauri), Bilboko Metroak eitb.eus-i jakitera eman dionez.

Matxura puntako orduan gertatu da, eta, ondorioz, bidaiariak pilatu dira inguru horretako geltokietan. Trenak bost minutuan behin pasatu ohi dira normalean, eta, arazoa dela eta, zazpi minutuan behin pasatu dira goizean; hau da, tren gutxiago ibili dira.

Bilboko Metroak jakinarazi duenez, matxura konpontzeko lanean ari dira, eta datozen orduetan arazorik ez izatea espero dute.