Auzitegi medikuek ere uste dute eskultura izan zela krimenaren arma

Auzitegi medikuen ustez, giza oin baten forma duen eskultura izan daiteke Jon Ezkurdia akusatuak senarra, Koldo Losada aktorea, hiltzeko erabili zuen arma. Horrela, berretsi egin dute Ertzaintzaren teoria.

Bizkaiko Lurralde Auzitegiak Ezkurdiaren aurkako epaiketaren bosgarren saioa egin du gaur, eta, horretan, biktimaren gorpuari autopsia egin zioten medikuek deklaratu dute.

Horien esanetan, Losadak hainbat kolpe jaso zituen buruan, eta erasoa ertzak dituen pisu handiko objektu batekin egina zegoen. Hots, arma akusatuak krimenaren ostean lagun bati posta zerbitzuz igorritako eskultura izan daiteke.

Herenegun, ikerketa koordinatu zuen ertzainburuak deklaratu zuen, eta krimena gauzatzeko erabilitako arma eskultura hori dela zehaztu zuen.

Hain zuzen ere, Koldo Losada etxeko sofan erdi lo zegoela egin ei zion eraso Ezkurdiak, agente horren hitzetan.

Auzitegi medikuek berretsi egin dute hipotesi hori, eta hiltzaileak kolpeak "indar handiz" egin zituela gaineratu dute.

Astelehenean, Ezkurdia artatu duten psikiatrek deklaratuko dute, eta akusatua agertzen den hainbat grabazio ikusiko dituzte.