Arintzen ari da elurraren eragina bigarren mailako errepidetan

Elurra eragozpen handiak eragin ditu egunaren lehen zatian errepide sare nagusian, Eusko Jaurlaritzako Segurtasun Sailak eitb.eusi jakinarazi dioenez.

Hala, zirkulaziorako arazoak izan dira A-1 errepidean, elurragatik. Goizean, Agurain eta Egino artean eta Altsasun, eskuineko erreitik bakarrik igaro zitezkeen ibilgailuak.

Bestalde, goizeko lehen orduan kamioiek AP-68 autobidetik -Altube eta Bilbo artean, Bilborako noranzkoan- igarotzeko debekua izan badute ere, dagoeneko altxa dute debekua.

Arratsaldeko 18:00etan jasotako informazioaren arabera, bigarren mailako errepideei dagokienez, ibilgailuek kateak behar dituzte Baraibartik Aralarrerako NA-7510 errepidean, 3. kilometrotik aurrera eta Isaban, NA-2000 (Isaba-Zuriza) errepidean 0 kilometrotik aurrera.

Mendateei erreparatuta, itxita dago NA-137 errepidea (Burgui-Isaba-Frantzia), 55. kilometrotik aurrera (Ferial). Itxita dagoen beste errepide bat Aralar mendatea da (Gi-3591), baina kamioentzat eta ibilgailu artikulatuentzat; autoek kateak behar dituzte mendate horretan. Halaber, Kurtzetan era guztietako ibilgailuek behar dituzte kateak.

Elurra kentzeko 63 makina Nafarroan

Errepidetan hobekuntza dagoen arren, Foru Gobernuak elurra kentzeko 53 makina ditu martxan, eta gaueko 22:00etatik aurrera 63 izango dira.