Zortzi pertsona atxilotu dituzte EAEn ibilgailutan lapurtzeagatik

Ertzaintzak zortzi pertsona atxilotu ditu EAEn azken zortzi orduetan, ibilgailutan lapurtzea egotzita. Atxiloketak Bilbon, Galdakaon, Astigarragan eta Gasteizen egin dituzte.

Herrizaingo Sailak jakinarazi duenez, lau pertsona Bilbon atxilotu dituzte. Horietako hiru Gartzia Salazar eta Naxa kaleetan atzeman zituzten herritarren laguntzari esker; izan ere, lapur batzuk aparkatutako ibilgailuak indarrez zabaltzen ari zirela jakinarazi zioten deitzaileek SOS Deiak-i.

Laugarren atxiloketa goizaldean egin du Ertzaintzak San Frantzisko kalean, gizon bat "in fraganti" harrapatu baitute ibilgailu bateko leihoa hausten eta barruan sartzen.Atzo, gaueko hamarretan bi pertsona Bekea industrialdean, Galdakaon (Bizkaia), aparkatutako kamioi batean lapurtzen saiatu ziren.

Ertzaintzaren patruila batek bi ibilgailu ikusi zituen kamioi baten aldamenean eta, polizia zegoela ikusita, ibilgailuetako gidariek ihesari ekin zioten abiadura bizian. Polizia-autoa errepidean gurutzatu zen, ihes zihoazenei bidea hautsi nahian, baina ihesaldian aurretik zihoan ibilgailuak polizia-autoaren kontra jo eta abiadura handiz aurrera jarraitzea lortu zuen.

Beste ibilgailuko gidariak bolante-kolpea jo zuen eta ibilgailutik jaitsi zen, errekarantz korrika ihes egiten jarraitzeko. Halere, ibaian ertzainek hura harrapatu eta atxilotu zuten, indarra erabiliz egindako lapurretaren delitu bat egotzita.

Halaber, Ertzaintzak ikertzen jarraitzen du, ihes egitea lortu zuen pertsona atxilotzeko.Atzo arratsaldean bikote bat atxilotu zuten Astigarragan, udalerriko Bidebitarte industrialdean zeuden zenbait kamioitan tresnak lapurtu izana egotzita.

Dirudienez, gizon batek eta emakume batek hiru kamioitako erreminta-kutxak indarrez zabaldu zituzten. Agenteek harrapatu zituztenean, poltsa batean ostutako tresnak eta enpresa batetik kendutako kartel bat zeramatzaten bi susmagarriek.