Gizartea -
Sutea Seseñan (Toledo)
Gurpilak erregai bihurtzea proposatu zuen enpresa publiko batek
Sutea mendean hartu dute, eta datozen hiruzpalau egunetan erabat itzaltzea espero dute. Ebakuatu zituzten bizilagunak euren etxeetara itzultzen hasi dira.
AGENTZIAK | ERREDAKZIOA
Seseñako (Toledo) gurpil-zabortegiko sutea piztu baino lau egun lehenago, pneumatikoak erregai bihurtzea proposatu zion Emgrisa enpresa publikoak Gaztela-Mantxako Gobernuari.
Emgrisak joan den maiatzaren 9an bidali zuen proposamena, eta Gaztela-Mantxako Gobernua eta Madrilgo Erkidegoa horrekin ados zeuden, EFEk zabaldu duenez. Erosketa publiko "berritzaile" horren proiektuak aurreikusten zuen Seseñako gurpilak erregai bihurtzea. Gainera, ohartarazi zuenez, gurpil-zabortegia "ingurugirorako eta inguruko bizilagunentzako balizko arrisku garrantzitsua da".
Europako gurpil-zabortegi handienean piztutako sutea joan den ostegunean hasi zen, oraindik argitzeke dauden arrazoiengatik. Bertan bost milioi gurpil daude, eta horietatik hiru heren jada erre dira. Gainera, sutearen ondorioz, 9.000 lagun inguru ebakuatu behar izan zituzten.
Sutea, kontrolpean
Larunbat honetan mendean hartu dute sutea, eta ke-zutabea kontrolpean mantentzeari ekin diote egunean zehar. Agintariek diotenez, hiruzpalau egunetan itzali ahal izango dute, eguraldi-baldintzak alde badituzte. Hori guztia ikusita, ebakuatutako bizilagunei euren etxeetara itzultzeko baimena eman diete larunbat honetan. Dena dela, aire librean egindako jarduerak saihesteko gomendatu diete.
Seseñako gurpil-zabortegia Europako handiena da. Argazkia: EFE
Ikerketa
Bestalde, ikerketako hainbat iturrik adierazi dutenez, hasierako zantzuen arabera, sutea nahita eragindakoa izan da. Ikerketa bere gain hartu du Guardia Zibilak, baina sutea guztiz amatuta izan arte itxaron beharko du.
