Boulevardetik kanporatu dituzte berriro erraustegiaren kontrakoak

Gipuzkoa Zutik plataformak deituta, Donostiako Boulevard Zumardiko kioskoan erraustegiaren kontra kanpaldia egiten ari zirenak kanporatu dituzte berriro Ertzaintzak eta Udaltzaingoak.

Agenteak 07:30 aldera bertaratu dira Boulevard Zumardian, kanpin-dendak batzeko eskatu diete bertan gaua eman dutenei, eta, kioskotik jaisten hasi zirenean, oihal-dendak eskuetatik kendu dizkietela salatu dute Gipuzkoa Zutik plataformakoek.

Udalak baieztatu duenez, pertsona bat atxilotu dute, identifikatzeari uko egin diolako. Eneko Goia buru duen erakundearen arabera, edozein protesta da zilegi, udal-arauak betetzen badira. Hortaz, "kalea baimenik gabe okupatuz gero", orain arte hartutako neurriak hartzen jarraituko dutela esan dute.

Gipuzkoa Zutikeko kideek 18 egun daramatzate kalean erraustegiaren aurka protestan. Plataformaren esanetan, hurrengo egunetarako prestatu duen egitarauarekin aurrera jarraituko du. Ondorioz, gaur Egia auzora joango dira; bihar, Antiguara, eta etzi, Boulevardera berriro. Asteburuan, berriz, Zubietan egongo dira.