Gizartea -
Indarkeria matxista
Mutil bat atxilotu dute BBK Liven neska bati sexu abusuak egiteagatik
Ustezko erasotzaileak, 19 urtekoak, ukituak egin zizkion neska bati. Aske utzi zuten igandean, epaiketaren zain.
EITB.EUS
Mutil batek neska bati Bilbao BBK Liven egin omen zizkion sexu abusuek musika jaialdia ilundu dute. Erasoa larunbat goizaldean jazo zen, eta ustezko erasotzailea atxilotzea lortu zuen Udaltzaingoak.
El Correo egunkariak gaurko alean dakarrenez eta Bilboko Udalak baieztatu duenez, mutil batek ukituak egin zizkiola salatu zuen neska batek. Lagunak eta jende ugari aurrean zegoela jazo zen erasoa, eta berehala jo zuen Udaltzaingoarengana. Hain justu, honek atzeman zuen ustezko erasotzailea, 19 urteko australiarra.
Gaua polizia-etxean igaro ostean, igandean epailearen aurretik pasatu zen atxilotutakoa. Honek aske utzi zuen, epaiketaren zain.
Itziar Urtasun Bilboko Udaleko Berdintasun, Lankidetza, Bizikidetza eta Jai zinegotziak gertatutakoa gaitzetsi du, eta Aste Nagusiari begira, sexu erasoen kontrako sentsibilizazio kanpaina bat prestatzen ari direla iragarri du. Gogorarazi duenez, emakumeek jai giroaz askatasunez gozatzeko eskubide osoa dute.
