Gizartea -
Ezbeharra
Sute handia izan da Barakaldoko etxebizitza batean
Sua Santa Teresa plazan dagoen etxebizitza batean sortu da, eta gutxienez 10 pertsona artatu behar izan dituzte horren ondorioz.
eitb.eus
Igande honetako arratsalde-gau partean, sute handia piztu da Barakaldoko Santa Teresa plazako 5. atariko lehenengo solairuan. Bertaratu diren larrialdi zerbitzuek (suhiltzailea, Ertzaintza, Udaltzaingoa eta anbulantziak) gutxienez 10 pertsona artatu behar izan dituzte, kea arnastu baitute edota nerbio-krisiak jota baitzeuden. Horietako hiru San Eloy ospitalera eraman dituzte, baina, itxura denez, ez dute ezer larririk.
Sua hartu duen pisuko eraikinak zazpi solairu ditu, eta auzotar guztiek utzi behar izan dituzte euren etxeak; guztira, 35 bat familia atera dituzte.
Sutea 21:20 inguruan hasi da, eta suhiltzaileek 22:30erako itzali dituzte garrak, baina bertan geratu dira jardunean, aireztatze-lanekin bukatu arte.
Oraingoz ez dute ezagutzera eman zer dela-eta piztu den sua.