Gizartea -
Zirkulazioa
12 zauritu, autobus, kamioi eta furgoneta banak elkar jota, Muxikan
Arin zauritu dira, baina horietako zazpi Galdakaoko Ospitalera eraman dituzte eta gainerakoak Gernikako osasun zentrora. BI-635 errepidean izan da ezbeharra, Zornotzarako noranzkoan.
eitb.com
Bizkaibusen autobus bateko 12 bidaiari arin zauritu dira ibilgailuak kamioi batekin eta furgoneta batekin ziandako istripuan, Muxikan (Bizkaia), Herrizaingo Sailak jakitera eman duenez.
Ezbeharra 08:45 aldera gertatu da BI-635 errepidean, Zornotzako noranzkoan, Bilbao-Gernika ibilbidea egiten ari zen autobus batek kamioi eta furgoneta banaren kontra talka egin duenean.
Istripuaren ondorioz 12 lagun arin zauritu dira: furgonetako gidaria, autobusekoa eta Bizkaibuseko bidaiariak. Horietako zazpi Galdakaoko Ospitalera eraman dituzte eta gainerakoak Gernikako osasun-zentroan geratu dira. Autobusean zihoazen beste bidaiari batzuk ezbeharra gertatu den lekuan bertan artatu dituzte.
Dagoeneko kendu dituzte ibilgailuak errepidetik, baina auto-ilarak sortu dira inguruan.
